Elorda komendanty Erjan Sádenov Nur-Sultandaǵy jaǵdaı týraly aıtty, dep habarlaıdy Egemen.kz.
Bas komendanttyń málimetinshe, elordada jaǵdaı tolyq baqylaýǵa alynǵan. Qalada 6 blokbeket táýlik boıy jumys isteıdi.
«Osy qıyn kezeńde azamattar nemquraılyqqa jol bermeý kerek. Tótenshe jaǵdaı kezinde alkogol ónimderin satýǵa tyıym salynǵanyn eske salǵym keledi. Zańbuzýshylar anyqtalsa, lısenzııasynan aıyrýǵa deıin qatań jazalanady», dedi Erjan Sádenov.
Qalada saǵat 23.00-den 07.00-ge deıin komendanttyq saǵat jalǵasady. Tótenshe jaǵdaı rejımine baılanysty qalada profılaktıkalyq is-sharalar ótkizilip, polısııa qyzmetkerleri turǵyn úı mańdaryn aralap shyǵady. Osy ýaqyt aralyǵynda zańsyz is-áreketterge jol bergenderdi jáne kóshi-qon zańnamasyn buzǵandardy anyqtaý maqsatynda 4649 turǵyn úı men 420 hostel tekserildi. Tekseris barysynda kóshi-qon zańnamasyn buzǵan 1372 adam anyqtaldy, 38 sheteldik elden shyǵaryldy. TJ rejımin buzǵany úshin QR ÁQBK 476-baby boıynsha 318 adam ákimshilik jaýapkershilikke tartyldy, 30-y qamaýǵa alynyp, 137-ine aıyppul salyndy.
Elordadaǵy jol qaýipsizdigi de baqylaýǵa alynǵan. TJ kezinde kólik quralyn mas kúıinde júrgizgen 10 júrgizýshi anyqtaldy, barlyǵy sot sheshimi boıynsha qamaýǵa alyndy.
Polısııa qyzmetkerleri blokbeketterdi qatań baqylaıdy. Blokbeketter qoıylǵan sátten bastap tyıym salynǵan zattardy anyqtaý úshin 50 myńǵa jýyq avtokólik muqııat tekserildi. Nur-Sultan qalasy men blokbeketterden 2 tegis uńǵyly «Saıga» myltyǵy, RGD-5 oqý-jattyǵý granatasy, CZvz.27. markaly tapansha, travmatıkalyq tapansha, saýyt, oq-dáriler, 11 bıt, 5 rezeńke taıaq, 3 kastet, 3 taıaq, 3 pyshaq, aerozol tapansha, kisen jáne burysh balony tárkilendi. Barlyq derek boıynsha tekseris júrgiziletini aıtyldy.
Blokbekette esirtki quraldaryn zańsyz saqtaǵan 2 derek anyqtaldy. Polısııa qyzmetkerleri kólikti toqtatyp, tekserý barysynda urlyq jasady degen kúdikpen 26 jastaǵy jolaýshyny anyqtady. Ol maýsymda Pavlodarda urlyq jasaǵany anyqtaldy. Sondaı-aq basqa kólikten Qaraǵandyda osyndaı qylmys jasaǵan 36 jastaǵy jolaýshy ustaldy.
Qalalyq komendatýra basshylyǵy komendanttyq saǵatty saqtaýǵa, qoǵamdyq tártip pen azamattardyń tynyshtyǵyn buzbaýǵa shaqyrady. Barlyq zańsyz áreket dereý toqtatylady.